Monday, July 18, 2011

കൊച്ചി മീറ്റ്‌-മീറ്റുകളെന്തിനു?




ജനശതാബ്ദി ഹരിപ്പാട് സ്റ്റേഷന്‍ കഴിഞ്ഞപ്പോള്‍ ട്രെയിനിന്റെ ജനലിലൂടെ ഞാന്‍ പുറത്തേക്ക് നോക്കി ഇരുന്നു.
കണ്ണെത്താത്ത ദൂരത്തോളം പാടങ്ങള്‍!
കണ്ടാലും കണ്ടാലും മതി വരാത്ത കാഴ്ച!
വണ്ടി അതി ശീഘ്രം വടക്കോട്ടു പാഞ്ഞുകൊണ്ടിരുന്നു.
അതിരാവിലെ കൊട്ടാരക്കരനിന്നും കൊല്ലത്തെത്തി, അവിടെ നിന്നും ജനശതാബ്ദിയില്‍ കയറിയ ഞാന്‍ വണ്ടി ലേറ്റ് അല്ലെങ്കില്‍ ഒന്‍പതേകാലിനു എറുണാകുളത്തു എത്തുമെന്ന പ്രതീക്ഷയിലാണ്. .അവിടെ നിന്നും കച്ചേരിപ്പടി, പിന്നെ മയൂരാ ഹോട്ടല്‍ , ബ്ലോഗ് മീറ്റ് നടക്കുന്ന സ്ഥലം.
കഴിഞ്ഞ ദിവസം ഡോക്റ്റര്‍ ജയന്‍ ഏവൂര്‍ വിളിച്ചിരുന്നു” ഇക്കാ വരുന്നില്ലേ? മത്താപ്പിനെയും ഞാന്‍ വിളിച്ചിട്ടുണ്ട്, എല്ലാവരെയും ഇങ്ങിനെ വിളിച്ചുകൊണ്ടിരിക്കുകയാണ്”

.
ആയുര്‍വേദ മെഡിക്കല്‍ കോളേജിലെ ഉയര്‍ന്നതസ്തികയില്‍ ജോലി ചെയ്യുന്ന ആ ഡോക്റ്റര്‍ തന്റെ വിലപ്പെട്ട സമയം ചെലവഴിച്ച് ബ്ലോഗ് മീറ്റില്‍ പങ്കെടുക്കാന്‍ എല്ലാവരെയും നേരില്‍ ക്ഷണിച്ചു കൊണ്ടിരിക്കുകയായിരുന്നു. ഇത്രത്തോളം ശ്രമം നടത്തി എല്ലാവരെയും ഒരുമിച്ച് കൂട്ടാന്‍ എന്താണ് അദ്ദേഹത്തിന് പ്രചോദനമായത്?
.ഒറ്റ വാക്കില്‍ ഉത്തരം ഉണ്ട്; സൌഹൃദം അത് മാത്രം.
തിരക്ക് പിടിച്ച ജീവിതത്തില്‍ മീറ്റില്‍ പങ്കെടുക്കുന്നതിനായി ഞാന്‍ സമയം കണ്ടെത്തിയതിന്റെ കാരണവും അത് തന്നെയാണ്.
കൃത്യ സമയത്ത് തന്നെ ജനശതാബ്ദി എന്നെ എറുണാകുളത്ത് എത്തിച്ചതിനാല്‍ മീറ്റ് ആരംഭത്തിലേ അവിടെ വന്നവരെ നിരീക്ഷിക്കാന്‍ എനിക്ക് കഴിഞ്ഞിരിക്കുന്നു. അവരുടെ ജീവിതവും തിരക്ക് നിറഞ്ഞതായിട്ടും ഇവിടെ വരാന്‍ അവരെ പ്രേരിപ്പിച്ചതു സൌഹൃദം നില നിര്‍ത്തുക എന്ന ഉദ്ദേശം മാത്രമാണ് എന്നത് നിസ്തര്‍ക്കമായ വസ്തുത തന്നെ.
രണ്ട് വര്‍ഷങ്ങള്‍ക്ക് മുമ്പ് ബ്ലോഗ് ആരംഭിക്കുമ്പോള്‍ ബ്ലോഗേര്‍സുമാര്‍ തമ്മിലുള്ള സൌഹൃദ ബന്ധം എന്റെ സ്വപ്നത്തില്‍ പോലുമില്ലായിരുന്നു.
.എന്ത് കൊണ്ടാണ് ഞാന്‍ ബൂലോഗത്തേക്ക് കടന്നു വന്നത്? എന്തു കൊണ്ടാണ് ബ്ലോഗ് മീറ്റുകളെ ഞാന്‍ ഇത്രമാത്രം ഇഷ്ടപ്പെടുന്നത്? ഞാന്‍ സ്വയം ആലോചിച്ചു കൊണ്ടിരുന്ന ചോദ്യങ്ങളാണ് ഇവ.
ചെറുപ്പം മുതല്‍ ഉണ്ടായിരുന്ന വായനയും എഴുത്തും ജീവിതത്തില്‍ എപ്പോഴും എന്നെ ഉന്മേഷവാനാക്കി.സാഹിത്യോപാസകന്‍ എന്ന നിലയില്‍ നാലു പേരുടെ മുമ്പില്‍ വെളിപ്പെടണമെന്നതിലുപരി നാല് പേരോട് കഥ പറയണമെന്നുള്ള അഭിനിവേശമാണ് എന്നില്‍ മുന്നിട്ട് നിന്നത്.
മനുഷ്യന്‍ കൂട്ടമായി ജീവിക്കാന്‍ ആരംഭിച്ച കാലം മുതല്‍ ആരംഭിച്ചതാണല്ലോ വട്ടംകൂടിയിരുന്ന് കഥ പറച്ചിലും കഥ കേള്‍ക്കലും.
പക്ഷേ എഴുതിയ രചനകളിലേറെയും ഞാന്‍ പ്രസിദ്ധനല്ല എന്ന കാരണത്താല്‍ (അതേ! എന്റെ രചനകള്‍ അരോചകമായിരുന്നില്ല എന്ന് മറ്റൊരാളായി മാറി നിന്ന് അത് വായിക്കുമ്പോള്‍ എനിക്കനുഭവപ്പെടാറുണ്ട്)പത്രാധിപരെന്ന കശ്മലന്‍ തിരികെ അയക്കുമ്പോള്‍ കഥ കേല്‍പ്പിക്കണമെന്നുള്ള അഭിനിവേശത്തിന്മേലുള്ള പ്രഹരമായാണു കഥാ നിരാസം എനിക്കനുഭവപ്പെട്ടത്.
ബ്ലോഗ് തുടങ്ങാന്‍ കാരണം അതാണ്. എനിക്ക് എന്തും എഴുതാം, എഡിറ്ററുടെ കത്രികാ പീഡനമില്ലാതെ അതേപടി പ്രസിദ്ധീകരിക്കാം. അഭിപ്രായം പറഞ്ഞില്ലെങ്കിലും 10 പേര്‍ വായിക്കുന്നതായി ബോദ്ധ്യപ്പെടാം. ഇതില്‍ കൂടുതലെന്ത് വേണം?! ബ്ലോഗറായതില്‍ ഞാന്‍ കൃതാര്‍ത്ഥനായി.
പക്ഷേ ചെറായി മീറ്റില്‍ പങ്കെടുത്ത് കഴിഞ്ഞതിനു ശേഷം കഥ പറച്ചിലും കഥ കേള്‍ക്കലും മാത്രമല്ല ബ്ലോഗിങ് കൊണ്ടുള്ള ഗുണം എന്നെനിക്ക് ബോദ്ധ്യപ്പെട്ടു. ഇത് വരെ ഞാന്‍ കാണാത്ത, രണ്ട് വര്‍ഷങ്ങള്‍ക്ക് മുമ്പ് എനിക്ക് ഒട്ടും പരിചയമില്ലാത്ത, ഒരു വലിയ കൂട്ടം ആള്‍ക്കാര്‍ എന്റെ ചങ്ങാതിമാരായി ബ്ലോഗ് മീറ്റുകളിലൂടെ ഉണ്ടായിരിക്കുന്നു.വിശാല സൌഹൃദം എന്നും ഇഷ്ടപ്പെടുന്ന അതിനു വേണ്ടി ദാഹിക്കുന്ന, സാഹചര്യത്തിന്റെ സമ്മര്‍ദ്ദത്താല്‍ അത് ലഭ്യമാകാതിരുന്ന എനിക്ക് ഈ സൌഹൃദങ്ങള്‍ വിലയുറ്റതായി തീര്‍ന്നു. അവര്‍ എല്ലാവരും എന്റെ കുടുംബാംഗങ്ങളായി. അവര്‍ എന്നെ “ഇക്കാ“ എന്ന് വിളിക്കുമ്പോള്‍ എന്നോ എനിക്ക് കൈമോശം വന്നതും തീര്‍ച്ചയായും തിരികെ എനിക്ക് ലഭിക്കുവാന്‍ ഞാന്‍ അതിയായി ആഗ്രഹിച്ചിരുന്നതുമായ ഊഷ്മള സ്നേഹം വീണ്ടും ലഭ്യമായതായി എനിക്ക് അനുഭവപ്പെടുന്നു.
മീറ്റുകള്‍ കുടുംബാംഗങ്ങളുടെ ഒത്ത്ചേരല്‍ പോലെ ആയി.
ഒരേ ബെഞ്ചില്‍ ഇരുന്ന് പഠിച്ചവരുടെ വര്‍ഷങ്ങള്‍ കഴിഞ്ഞുള്ള കൂടിച്ചേരലായി അത് തോന്നിച്ചു.
ബാല്യ കാല കളിക്കൂട്ടുകാരുടെ പുന:സമാഗമം പോലെ ആയി അത്.
അത്കൊണ്ട് തന്നെ ഇടപ്പള്ളി മീറ്റും എറുണാകുളം മറെയിന്‍ഡ്രൈവ് മീറ്റും, ഞാന്‍ ഒഴിവാക്കിയില്ല. തുഞ്ചന്‍ പറമ്പ് മീറ്റില്‍ തലേദിവസം തന്നെ പോയി മീറ്റില്‍ ഭാഗഭാക്കായി.
ഓരോ മീറ്റും പുതിയ സൌഹൃദം കൊണ്ട് തന്നു.
മുകളില്‍ പറഞ്ഞ കാരണങ്ങളാല്‍ മീറ്റുകള്‍ എനിക്ക് അനുഭൂതികളായി തീര്‍ന്നിരുന്നതിനാലാണ് ഡോക്റ്റര്‍ ജയന്‍ ഏവൂര്‍ ഫോണില്‍ വിളിച്ച് “ഇക്കാ വരുന്നില്ലേ“ എന്ന് ചോദിച്ചപ്പോള്‍ എല്ലാ തിരക്കുകളും മാറ്റി വെച്ച് എന്റെ കുടുംബാംഗങ്ങളെ, എന്റെ ബാല്യകാല സുഹൃത്തുക്കളെ, എന്റെ പണ്ടത്തെ കളിക്കൂട്ടുകാരെ കാണുവാനായി ഞാന്‍ ഓടിയെത്തിയത്. ഞാന്‍ ഇത് കുറിക്കുമ്പോള്‍ ബൂലോഗത്തിലെ പ്രായത്തില്‍ ഏറ്റവും ഇളയ ആള്‍ മുതല്‍ ഏറ്റവും മുതിര്‍ന്ന ആള്‍ വരെ ഓരോ മുഖവും എന്റെ മനസില്‍ തെളിഞ്ഞു വരുന്നു.(പരസ്പര സൌഹൃദത്തിനു പ്രായ വ്യത്യാസം ഒരു തടസമേ അല്ലെന്നും ബൂലോഗം തെളിയിക്കുന്നു) എന്തിനു പേരുകള്‍ ഞാന്‍ കുറിക്കണം.ആരെയെങ്കിലും വിട്ടു പോയാല്‍ ഇക്കാ എന്നെ മറന്നോ എന്ന ചോദ്യം പോലും എന്നെ വേദനിപ്പിക്കുമെന്നതിനാല്‍ ആരുടെയും പേരുകള്‍ ഞാന്‍ കുറിക്കുന്നില്ല.
എനിക്കനുഭവപ്പെടുന്ന ഈ വിചാര വികാരങ്ങളെല്ലാം ഏറ്റക്കുറച്ചിലായി മറ്റ് ബൂലോഗവാസികള്‍ക്കും അനുഭവപ്പെടുന്നുണ്ട് എന്നത് പച്ചപരമാര്‍ത്ഥം ആയതിനാലാണല്ലോ മീറ്റുകളില്‍ എല്ലാവരുടെയും സാന്നിദ്ധ്യം ഉണ്ടാകുന്നത്. അതു കൊണ്ടാണല്ലോ മീറ്റുകള്‍ എന്നെപ്പോലെ അവരെയും അഹ്ലാദഭരിതരാക്കുന്നത്. എല്ലാ തരത്തിലും പെട്ട അവര്‍ എല്ലാ തിരക്കുകളും മാറ്റി വെച്ച് വിടര്‍ന്ന ചിരിയോടെ ഓടിയെത്തുന്നത്.ഡോക്റ്റര്‍ ജയന്‍ ഏവൂരിനെ പോലുള്ളവര്‍, വിലപിടിച്ച തന്റെ സമയവും ധനവും ചെലവഴിച്ച് ഓരോരുത്തരെയും ഫോണില്‍ നേരില്‍ വിളിച്ച് ഓരോരുത്തരുടെയും സാന്നിദ്ധ്യം ഉറപ്പാക്കുന്നത്
.ഇന്‍ കം ടാക്സിലെ പി.ആര്‍.ഓ, ആയ ശ്രീ സജീവ് സ്നേഹ സാഗരം ഇരമ്പുന്ന മനസുമായി തന്റെ ഔദ്യോഗിക ഭാവങ്ങള്‍ ഒന്നുമില്ലാതെ അമിത ഭാരത്താലുള്ള നടുവേദന പോലും വകവെക്കാതെ ഒരേ ഇരിപ്പില്‍ ഇരുന്ന് മീറ്റില്‍ പങ്കെടുത്തവരുടെ എല്ലാം രേഖാ ചിത്രങ്ങള്‍ വരക്കുകയും എല്ലാവരോടും ഒരേ പോലെ പെരുമാറുകയും ചെയ്യുന്നതും അത് കൊണ്ടാണല്ലോ.
നൂറുകൂട്ടം ബുദ്ധിമുട്ടുകള്‍ക്കിടയില്‍ കൊട്ടോട്ടി പാഞ്ഞെത്തുന്നത് അതേ കാരണത്താല്‍ തന്നെ.കൊട്ടോട്ടിയുടെ പുറകില്‍ നിന്ന് വില്ലേജുമാന്‍ മറ്റാരോടൊ കുശലം പറയുന്നതും അത് കൊണ്ട് തന്നെ

നന്ദനും ജോയും പ്രവീണ്‍ വട്ടപ്പറമ്പും
മനോരാജും,സജീം തട്ടത്ത്മലയും മറ്റെന്ത് കാരണത്താലാണ് സൌഹൃദം പുതുക്കുന്നത്.മത്താപ്പും അജുവും ജിക്കുവും ഇത്രക്ക് സന്തോഷവാന്മാരാകുന്നത്.
റെജി(പുത്തന്‍പുരക്കല്‍)യുംപൊന്മളക്കാരന്‍ അജയനും മീറ്റ് നടത്തിപ്പില്‍ താന്താങ്ങളുടെ ഭാഗം കയ്യാളുന്നത്. വിദൂരമായ സ്ഥലത്ത് നിന്നും തലേ ദിവസമേ പൊന്മളക്കാരന്‍ ജയനും സജീം തട്ടത്തുമലയും വന്ന് എറുണാകുളം മീറ്റ് സ്ഥലത്ത് തങ്ങുന്നത്. ഉപജീവന മാര്‍ഗമായ തന്റെ ഷോപ്പ് സ്റ്റാഫിനെ ഏല്‍പ്പിച്ച് യൂസുഫ്പാ മോണോലിസാ ചിരിയുമായി മീറ്റുകളില്‍ വരുന്നത്.തൂതപ്പുഴ ഓരത്ത് നിന്നും മുനീർ വിടർന്ന ചിരിയുമായി പാറി വന്നത്. ചുവന്ന വരയുള്ള ഷര്‍ട്ട് ധരിച്ച് കമ്പറും, പിന്നെ വണ്ടി പിരാന്തനും, ഗ്രാമീണൻ എന്നതിനു പകരം വില്ലേജുമാൻ എന്ന് വിളിക്കാൻ ഇഷ്ടപ്പെടുന്ന കോട്ടയംകാരനും സുന്ദരമായി പാടുന്ന മണികണ്ഠനും ജിക്ക് ജിക്ക് എന്ന് ഓടി നടക്കുന്ന ജിക്കുവും ഒരു സംഭവമായ കുമാരനും വെള്ള ഹലുവാ പോലിരിക്കുന്ന ചാണ്ടിച്ചനും പുണ്യാളനും ഒരു സംശയം കൊണ്ട്നടക്കുന്നത് പോലുള്ള സംഷിയും റോഡരുകില്‍ നില്‍ക്കാന്‍ സന്തോഷമുള്ള സന്തോഷും ഒട്ടും പ്രായമില്ലാത്ത കാർന്നോരും ഷിജു ബഷീർ എന്ന പകൽക്കിനാവനും മലയാലപ്പുഴക്കാരൻ റെജിയും ഫ്രീ ലാൻഡിൽ വിഹരിക്കുന്ന പാമ്പള്ളി എന്ന സന്ദീപും ഒട്ടും വേഗതയില്ലാത്ത എന്നാൽ അതിമനോഹരമായി ചിരിക്കുന്നകായംകുളം എക്സ്പ്രസ്സ് അരുണും ജേക്കബ് രാജനും വെടി വെക്കുമ്പോള്‍ കൈ വിറക്കുന്ന രഘുനാഥനും
അവതാരമായ സെന്തിലും
ഷിബു ഫിലിപ്പും റഷ്യക്കാരൻ ദിമോത്രോവും ബ്ലോഗിൽ ദീർഘവും സാന്ദ്രവുമായ അതി മനോഹര നോവൽ രചിച്ച എന്റെ പ്രിയ സ്നേഹിതൻ (പത്നീസമേതനായി)കേരളദാസനുണ്ണിയും, ഒടിയനെന്ന ശ്രീജിത്തും അനൂപ്കുമാറും ഷിനോജും മഹേഷ് വിജയനും സതീഷ്മേനോനും ഷാജി.റ്റി.വിയും ജോസ് ആന്റണിയും അഞ്ചൽക്കാരൻ ഷിഹാബും മഹേഷ് ചെറുതനയും ജയരാജും എറുണാകുളത്ത് ഈ മീറ്റിൽ പങ്കെടുക്കാൻ എത്തിച്ചേർന്നതും ഈ വികാരവിചാരങ്ങളോടെയാണല്ലോ.ജോസഫ് ആന്റണിയും റ്റി.ആർ.പ്രദീപും അനൂപ് വർമയും,റിജോ മോനും
സീനിയര്‍ സിറ്റിസണ്‍ രഘുനാഥന്‍ സാറും
പി.കുമാരന്‍ സാറും റ്റി.കെ.അജയകുമാറും അജു എബ്രഹാമും ആദ്യമായി ബ്ലോഗ് മീറ്റില്‍ വന്നതാണെങ്കിലും ഈ സൌഹൃദാന്തരീക്ഷം അവര്‍ക്കും ഏറെ ഇഷ്ടപ്പെട്ടുകാണുമെന്ന് ഉറപ്പ്. വനിതാ വിഭാഗത്തില്‍ എന്റെ കുഞ്ഞനിയത്തി സോണിയാ, റിപ്പോര്‍ട്ടര്‍ അഞ്ജുനായര്‍, കുസുമം പുന്നപ്ര, നന്ദിനി, ഇന്ദ്രസേന, ശാലിനി എന്നിവര്‍ സജീവമായി ഈ സൌഹൃദം പങ്കിട്ടതും മീറ്റിന്റെ ഗുണഫലം കൊണ്ട് തന്നെയാണ്.
വീട്ടിലും ജോലിസ്ഥലത്തും ചെലവഴിക്കുന്ന യാന്ത്രികമായ നിമിഷങ്ങളില്‍ നിന്നും വ്യത്യസ്തമായി ആഹ്ലാദകരമായ ചില മണിക്കൂറുകളാണു ബ്ലോഗ് മീറ്റുകളില്‍ നിന്നും ലഭ്യമാകുന്നത്.ഇതുവരെയും യാതൊരു മുന്‍ പരിചയവുമില്ലാതിരുന്ന ഒരു കൂട്ടം ആള്‍ക്കാര്‍ സുഖാന്വേഷണങ്ങളുമായി നമ്മളിലേക്ക് വരുന്നു.നമ്മുടെ എല്ലാ വിവരങ്ങളും അവര്‍ അന്വേഷിക്കുന്നു. നാം അവരുടെ വിവരങ്ങളും തിരക്കുന്നു.
നോക്കുക! എത്ര സന്തോഷമാണത്.
എന്റെ മകന്റെ കുട്ടിയുടെ അസുഖവുമായി ബന്ധപ്പെട്ട് കൊട്ടോട്ടിക്കാരന്‍ സാബു ദിവസവും എന്നെ വിളിച്ചുകൊണ്ടിരുന്നു.എന്തെങ്കിലും വിശേഷങ്ങള്‍ ഉണ്ടെങ്കില്‍ പൊന്മളക്കാരന്‍ ജയന്‍ എന്നെ വിളിച്ചിരിക്കും. യൂസുഫ്പാ ഇടക്കിടക്ക് വിവരങ്ങള്‍ അന്വേഷിച്ച് കൊണ്ടിരിക്കും. കേരളദാസനുണ്ണിയും ഹാഷിമും അപ്രകാരം തന്നെ.ബൂലോഗത്തെ ഒന്ന് രണ്ട് പെണ്‍കുട്ടികള്‍ അവരുടെ ജീവിതത്തില്‍ ചില പ്രതിസന്ധികള്‍ ഉണ്ടാക്കിയ പ്രശ്നങ്ങള്‍ ഞാനുമായി ഏറെ നേരം ചര്‍ച്ച ചെയ്തു. അവരുടെ മനസിന്റെ ഭാരം ഇറക്കി വെക്കാനായി; എനിക്ക് അവരെ ആശ്വസിപ്പിക്കനുമായി. ഹാറൂണ്‍ സാഹിബ് (ഒരു നുറുങ്ങ്) തന്റെ രോഗാവസ്തയിലും സമയം കിട്ടുമ്പോഴൊക്കെ എന്നെ വിളിക്കാറുണ്ട്. ഞാനും എല്ലാവരുമായും ബന്ധപ്പെടുന്നു. നോക്കൂ! ഇതെത്ര സന്തോഷപ്രദമാണ്. ഇതെല്ലാം ബ്ലോഗിലൂടെയും ബ്ലോഗ് മീറ്റ്കളിലൂടെയും കൈ വന്ന ഭാഗ്യമാണ്.
ബ്ലോഗ് മീറ്റ് എന്തിനു? എന്ന ചോദ്യത്തിന്റെ ഉത്തരം ഇതൊക്കെ തന്നെയാണ്.
സ്നേഹത്തിന്റെ വസന്തം ബൂലോഗത്ത് പൂത്ത് തളിര്‍ക്കട്ടെ.
എല്ലാവര്‍ക്കും ആശംസകള്‍.

22 comments:

  1. മീറ്റുകള്‍ നന്നായി നടക്കണം ...
    പോസ്റ്റ്‌ നന്നായി ...
    അടുത്ത മീറ്റ്‌ പറ്റിയാല്‍ കൂടണം ..

    ReplyDelete
  2. നഷ്ടപ്പെട്ട പലതും തിരിച്ചു ലഭിച്ചത് പോലെയാണ്‌ ഒരു മീറ്റിൽ പങ്കെടുത്താൽ ഞാനനുഭവിക്കുന്ന അനുഭൂതി.ഞാനൊറ്റയ്ക്കല്ല എനിയ്ക്ക് ആരൊക്കെയോ ഉണ്ടെന്ന് ദൈവം ഉറപ്പ് തരുന്നത് പോലെ.
    നന്ദി ശരീഫിക്കാ..ഈ പോസ്റ്റോട്കൂടി ഒന്ന് കൂടി താങ്കളോടടുത്തു.

    ReplyDelete
  3. കൊള്ളാം. ഫോട്ടോസ് ഞാനും പോസ്റ്റ് ചെയ്തിട്ടുണ്ട്. വന്നുകാണുമല്ലോ. http://kaarnorscorner.blogspot.com/2011/07/blog-post.html

    ReplyDelete
  4. പോസ്റ്റ്‌ നന്നായി

    ReplyDelete
  5. ഈ സൌഹൃദങ്ങള്‍ ഒരിക്കലും നിലക്കാതിരിക്കട്ടെ!
    വെറുമൊരു കൂട്ടായ്മ എന്നതിലുപരി സമൂഹനന്മക്കും രാജ്യനന്മക്കും വേണ്ടി എന്തെങ്കിലും ചെയ്യാന്‍ സക്രിയമായ ഇടപെടലുകള്‍ ഉണ്ടാവട്ടെ!
    അതിനു താങ്കളെ പോലുള്ളവര്‍ മുന്‍കൈ എടുക്കട്ടെ!
    ആശംസകള്‍.

    ReplyDelete
  6. സൌഹൃദം പൂത്ത് ഉലയട്ടെ...

    ReplyDelete
  7. പ്രിയപ്പെട്ട, പ്രദീപ്, യൂസുഫ്പാ, കാര്‍ന്നോരു, റ്റോംസ്/തട്ടകം, ഇസ്മെയില്‍ കുറുമ്പടി, അജിത്,
    നിങ്ങളുടെ എല്ലാം അഭിപ്രായങ്ങള്‍ക്ക് നന്ദി.
    പ്രദീപ്, അടുത്ത മീറ്റില്‍ പങ്കെടുകാന്‍ ഇടവരട്ടെ
    യൂസുഫ്പാ, ആ ചിന്തകള്‍ തന്നെ എന്റെ മനസിലും; താങ്കളുമായി ഇനി അടുക്കാന്‍ അല്‍പ്പം പോലും സ്ഥലം ഇല്ലാത്ത വിധം ഞാന്‍ താങ്കളോടു അത്രക്ക് അടുത്താണു ഉള്ളത്.
    കാര്‍ന്നോരേ അതെല്ലാം ഞാന്‍ കണ്ട് കഴിഞ്ഞു.
    ഇസ്മെയില്‍:- തീര്‍ച്ചയായും നല്ല കാര്യങ്ങള്‍ക്ക് മുമ്പില്‍ തന്നെ കാണും.
    അജിത്, നന്ദി.

    ReplyDelete
  8. അതേ,
    ഒരു പൊട്ട് ഉദ്യോഗം കിട്ടുമ്പോഴേയ്ക്കും മിക്കവരും തറയിലും ആകാശത്തുമല്ലാതെ നടക്കുന്ന നമ്മുടെ നാട്ടിൽ ഔദ്യോഗികമായി ഉന്നതമായ ഒരു പദവിയിലുള്ള ഡോ.ജയൻ ദാമോദരനെ പോലുള്ള വേറിട്ട് നിൽക്കുന്ന വ്യക്തിത്തങ്ങൾ വാഴ്തപ്പെടേണ്ടതു തന്നെ. എന്തിന് ഷെരീഫ്ക്കയോ? സംഗതി ജുഡീഷ്യറിയല്ലായിരുന്നോ?

    പ്രത്യേകിച്ച് പണിയൊന്നുമില്ലാത്ത ഞാൻ മുതൽ നാട്ടിലും വിദേശത്തും ആയിരം മുതൽ ലക്ഷങ്ങൾ വരെ ശമ്പളം വാങ്ങുന്നവർ വരെ ബ്ലോഗ് മീറ്റുകളിൽ വലിപ്പച്ചെറുപ്പമില്ലാതെ വന്നു ചേരുന്നത് സ്നേഹിക്കാനുള്ള ഒരു മനസുണ്ട് എന്നതുകൊണ്ടാണ്. ഈ സൌഹൃദങ്ങൾ എന്നും ഇങ്ങനെ തന്നെ നിലനിൽക്കണ മേ എന്നാണ് എപ്പോഴും ഞാൻ ആഗ്രഹിക്കുന്നത്.

    സ്നേഹത്തിന്റെ ഭാഷ സ്നേഹം മാത്രമാണ്. അതിന് നിമിത്തമാകുന്ന ഒരു മാധ്യമമാകുന്നതുകൊണ്ടു കൂടിയാണ് ബ്ലോഗ് എനിക്ക് ഒരു ആവേശമാകുന്നത്!

    ReplyDelete
  9. ഷെറിഫ് സാര്‍ ,

    ഇടയ്ക്കിടയ്ക്ക് കണ്ടു മുട്ടുവാനും കുറച്ചു നേരം 
    അടുത്തിരുന്നു സ്നേഹസംഭാഷണം നടത്തുവാനും 
    ഇത്തരം മീറ്റുകള്‍ കളമൊരുക്കുന്നുണ്ട്.

    ReplyDelete
  10. >>>സ്നേഹത്തിന്റെ ഭാഷ സ്നേഹം മാത്രമാണ്. അതിന് നിമിത്തമാകുന്ന ഒരു മാധ്യമമാകുന്നതുകൊണ്ടു കൂടിയാണ് ബ്ലോഗ് എനിക്ക് ഒരു ആവേശമാകുന്നത്!<<<
    പ്രിയപ്പെട്ട സജീം തട്ടത്തുമല, താങ്കളുടെ ഈ വാക്കുകള്‍ക്ക് എന്റെ അടിയൊപ്പ്.

    പ്രിയം നിറഞ്ഞ കേരളദാസനുണ്ണി സര്‍, താങ്കളുടെ അഭിപ്രായം തന്നെ എന്റേതും, നന്ദി സുഹൃത്തേ!

    ReplyDelete
  11. സ്നേഹത്തിന്റെ വസന്തം ബൂലോഗത്ത് പൂത്ത് തളിര്‍ക്കട്ടെ...ഇനിയും കാണണം..എന്നും ഈ സൌഹൃദങ്ങള്‍ നിലനില്‍ക്കട്ടെ..

    ReplyDelete
  12. koottukaar othucherunnath manassinu sandhosham tharunna kaaryamaanu......athuthudarnnum undaakatte

    ReplyDelete
  13. പ്രിയപ്പെട്ട ഒടിയന്‍ , കൊച്ചുമോള്‍ , അഭിപ്രായത്തിനും സന്ദര്‍ശനത്തിനും നന്ദി.

    ReplyDelete
  14. തൊടുപുഴയിൽകാണില്ലേ.... "ഒരു ചിന്ന പ്രോബ്.. വരും വരാതിരിക്കാനാവില്ലല്ലോ......

    ReplyDelete
  15. ഷെരീഫിക്ക..ബ്ലോഗുമീറ്റുകളിൽ നടക്കുന്ന കാര്യ പരിപാടികളേക്കാളുപരി,പങ്കെടുക്കുന്നവരുടെ മനസ്സുകളെത്തമ്മിൽ ബന്ധിപ്പിക്കുന്ന സ്നേഹത്തിന്റെയും സൗഹൃദത്തിന്റെയും ആഴത്തെ ഈ പോസ്റ്റ് വെളിപ്പെടുത്തുന്നു..ആ സൗഹൃദകൂട്ടായ്മയിൽ നിങ്ങളോടൊത്തുചേരാൻ എന്നെങ്കിലും സാധിക്കുമെന്നു കരുതുന്നു...

    ReplyDelete
  16. കൊച്ചി മീറ്റിനെ കുറിച്ചുള്ള പോസ്റ്റ്‌ കല്‍ ഒന്ന് രണ്ടെണ്ണം വായിച്ചു.. അരുണ്‍ കായംകുളതിന്റെത് ഉള്‍പടെ ..ബ്ലോഗ്‌ ലോകത്തെ സൌഹൃദങ്ങളുടെ ഭംഗി അറിയുന്നു ..ആശംസകള്‍

    ReplyDelete
  17. പ്രിയ പൊന്മളക്കാരന്‍, 31 തീയതിയില്‍ റമദാന്‍ വൃതമല്ലെങ്കില്‍ ദൈവം അനുവദിച്ചാല്‍ ഞാന്‍ തൊടുപുഴയില്‍ കാണും.

    ReplyDelete
  18. പ്രിയ ഷിബൂ തോവാള, റ്റാങ്കളുടെ പ്രാര്‍ത്ഥന സഫലമാകട്ടെ, സന്ദര്‍ശനത്തിനും അഭിപ്രായത്തിനും നന്ദി.

    ReplyDelete
  19. പ്രിയ INTIMATE STRANGER, സന്ദര്‍ശനത്തിനും അഭിപ്രായത്തിനും നന്ദി സുഹൃത്തേ!

    ReplyDelete
  20. ബ്ലോഗ്‌ മീറ്റുകള്‍ എന്തിനു സങ്കടിപ്പിക്കുന്നു എന്ന സംശയത്തിനുള്ള വ്യക്തമായ വിവരണം. എഴുത്തിലൂടെ മാത്രം അറിഞ്ഞവര്‍ തമ്മിലുള്ള കൂടിച്ചേരല്‍, അത് വല്ലാത്തൊരു അനുഭൂതിതന്നെയാണ് അനുഭവിക്കുന്നവര്‍ക്ക്.
    ഇക്കാ, ആശംസകള്‍ നേരുന്നു ഈ വിവരണത്തിനും, അങ്ങയുടെ ആ വലിയ മനസ്സിനും.

    ReplyDelete
  21. ഈ സൌഹൃദങ്ങളും സ്നേഹവും എന്നും നില നില്‍ക്കട്ടെ.

    ReplyDelete
  22. പ്രിയപ്പെട്ടAshraf Ambalathu, താങ്കളുടെ സന്ദര്‍ശനത്തിനും അഭിപ്രായത്തിനും നന്ദി ചങ്ങാതീ.

    പ്രിയ മുല്ലാ,തീര്‍ച്ചയായും നിലനില്‍ക്കട്ടെ.നന്ദി.

    ReplyDelete