സിനിമാ ആരംഭിക്കുന്നതിന് മുമ്പ്.....

90 രൂപാ  നൽകി ഒരു  സി.ഡി. വാങ്ങുന്നത് മാനസികോല്ലാസത്തിനായി  സിനിമാ കാണുന്നതിന് വേണ്ടിയാണ്. ടിക്കറ്റെടുത്ത്  കൊട്ടകയിൽ കയറുന്നതും  ഇതേ ഉദ്ദേശത്തിനാണ്. അങ്ങിനെ  നമ്മൾ അദ്ധ്വാനിച്ചുണ്ടാക്കിയ  പൈസാ കൊണ്ട്  നമ്മുടെ  സമയം ഉപയോഗിച്ച്  നമ്മൾ  കാണുന്ന  സിനിമാ ആരംഭിക്കുന്നതിന് മുമ്പ്  സർക്കാർ നിർദ്ദേശ പ്രകാരം  പുകവലി ഹാനികരമെന്നുള്ള  പരസ്യങ്ങളും  ജന്തു ജാലങ്ങളെ ഉപദ്രവിച്ചിട്ടില്ലെന്ന  ഡിക്ളറേഷനും  എഴുതി കാണിക്കുന്നത് സമൂഹ നന്മ കരുതി നമ്മൾ  ക്ഷമിക്കുന്നു.
 പക്ഷേ സിനിമാ എടുത്തവന് ആരോടെല്ലാമോ  നന്ദി പറയുന്നതിന്  നമ്മൾ പൈസാ മുടക്കി  കാണുന്ന സിനിമാക്ക്  മുമ്പ്  നമ്മുടെ സമയം നഷ്ടപ്പെടുത്തുന്നത് എന്ത് മര്യാദയാണ്?
അവന്റെ അപ്പന്  നന്ദി, അപ്പാപ്പന് നന്ദി, അവന്റെ അമ്മായി അപ്പന് നന്ദി, പിന്നെ  മെഗാസ്റ്റാർ ഇട്ടുണ്ണൻ കോദണ്ഡ കുറുപ്പിന് നന്ദി,  അവന്റെ ഫിലിം ഫാൻസ് അസ്സോസിയേഷന് നന്ദി,  അവന്റെ ചാവാലി ബാങ്കിന് നന്ദി,  പിന്നെയും പിന്നെയും കണ്ണിൽ കാണുന്നവർക്കെല്ലാം നന്ദി...... ഇതെല്ലാം നമ്മൾ വായിക്കണം പോലും, അതും നമ്മൾ പൈസാ മുടക്കി നമ്മുടെ സമയം നഷ്ടപ്പെടുത്തി കാണുന്ന സിനിമാ കാണൂന്നതിന് മുമ്പ്  ഇതെല്ലാം കണ്ടേ തീരൂ എന്ന് ഇവൻ നിർബന്ധം പിടിക്കാൻ, ഇവൻ ആര്?  നമ്മുടെ മച്ചുനനോ മച്ചമ്പിയോ?!!! ഇത് കാണുന്ന നമുക്ക് എപ്പോഴെങ്കിലും ഇവനോ ഇവനെ പോലുള്ള  സിനിമാക്കാരോ എപ്പോഴെങ്കിലും നന്ദി പ്രകടിപ്പിക്കുന്നുണ്ടോ? അതും നമ്മളെ പോലുള്ളവർ  കുത്തിയിരുന്ന് പൈസാ മുടക്കി സിനിമാ കാണുന്നതിന്, ഒരു നന്ദി പറച്ചിൽ,  അതിനവന് സമയവുമില്ല, നന്ദിയുമില്ല.....