ഇൻഡ്യക്കാരുടെ ഇംഗ്ളീഷ് രചനയിൽ അരുന്ധതി റോയിയുടെ ദി ഗോഡ് ഓഫ് സ്മാൾ തിങ്ക്സിന് ശേഷം ഉണ്ടായിട്ടുള്ള ഏറ്റവും ഉജ്ജ്വലമായ രചനയെന്ന് ഡക്കാൺ ഹെറാൽഡ് അഭിപ്രായം പറഞ്ഞ സീരിയസ് മെൻ എന്ന ഈ പുസ്തകത്തിന്റെ രചയിതാവ് മനു ജോസഫ് ആണ്. മലയാളത്തിലേക്ക് വിവർത്തനം ചെയ്തത് അനൂപ് ചന്ദ്രനും.
വിരസമായ ആരംഭത്തിന് ശേഷം വായന ഉഷാറായി വന്നപ്പോൾ തോന്നി ഇത് കൊള്ളാമല്ലോ എന്ന്. മനുഷ്യ മനസ്സിന്റെ ഓരോ അവസ്തയും ശരിക്കു കണ്ടും നിരീക്ഷിച്ചും എഴുതിയ പുസ്തകം തന്നെയെന്ന് വായിച്ച് തീർന്നപ്പോൾ തിരിച്ചറിഞ്ഞു.
മുംബെ മഹാ രാജ്യത്തിലെ ചേരികളിലൊന്നിൽ വസിച്ച് കൊണ്ട് രാജ്യത്തെ പ്രശസ്ത ശാസ്ത്ര ഗവേഷണ സ്ഥാപനത്തിൽ ക്ളാർക്കായി ജോലി ചെയ്യുന്ന അയ്യൻ മണി താൻ സ്വപ്നം കാണുന്ന ജീവിതം കയ്യെത്തി പിടിക്കാൻ തന്ത്രപൂർവം അപാരമായ നീക്കങ്ങളിലൂടെ തന്റെ പത്ത് വയസ്സുകാരനായ മകനെ ജീനിയസ് പട്ടം കൃത്രിമമായി സൃഷ്ടിച്ച് ഉദ്ദേശ ലക്ഷ്യം സാധിക്കുന്ന കഥ പറയുന്ന ഈ പുസ്തകം സമൂഹത്തിലെ ഉന്നത ശ്രേണിയിലുള്ളവരുടെ സവർണ മാനസികാവസ്ഥ കൂടി വെളിപ്പെടുത്തുന്നു. അതിനിടയിൽ ശാസ്ത്രമേ തന്റെ പ്രാണവായു എന്ന് വിശ്വസിക്കുന്ന മഹാനായ ഒരു ശാസ്ത്രജ്ഞന്റെ മാനസിക സംഘർഷങ്ങളും അയാൾ ഒരു പെണ്ണിനാൽ ചതിയിൽ പെടുന്നതും പിന്നീട് അയ്യൻ മണിയിലൂടെ അതിനെ അതിജീവിക്കുന്നതും തന്മയത്വത്തോടെ വരച്ചിട്ടിരിക്കുന്നു..
പാത്ര രചന സൂക്ഷ്മതയോടെ കൈകാര്യം ചെയ്തത് കൂടാതെ രംഗാവിഷ്കരണം അതി ഗംഭീരമാക്കിയിട്ടുണ്ട് എന്ന് പറയാതെ വയ്യ. മുംബൈ മഹാ നഗരത്തിലെ പ്രഭാതത്തിൽ ചേരി നിവാസികൾ പ്രാഥമിക കർമ്മങ്ങൾ അനുഷ്ഠിക്കാൻ ടോയ്ലറ്റിന്റെ മുമ്പിൽ ഒരു കയ്യിൽ ബക്കറ്റുമായി നീണ്ട ക്യൂവിൽ നിലയുറപ്പിക്കുന്ന രംഗം ഉദാഹരണമായെടുക്കുന്നു.
350 പേജുള്ള ഈ നോവൽ 225 രൂപക്ക് ഡിസി. ബുക്ക്സ് ആണ് പ്രസിദ്ധീകരിച്ചിട്ടുള്ളത്.
No comments:
Post a Comment