പെരുന്നാൾ സ്വപ്നങ്ങൾ

 മഴ ചെറുതായി ചാറുന്നുണ്ട്. ആലപ്പുഴ വട്ടപ്പള്ളിയിലൂടെ സക്കര്യാ ബസാറിലേക്ക് ഞാൻ നടക്കുകയാണ്.

നാളെ വലിയ പെരുന്നാളാണ്. ഇന്ന് പെരുന്നാൾ രാവും. ആലപ്പുഴയിൽ  പെരുന്നാളിനെക്കാളും   തലേ ദിവസം പെരുന്നാൾ രാവിനാണ് ആഘോഷം കൂടുതൽ. അത് കൊണ്ടാണ് ഇന്ന് തന്നെ ഞാൻ  ഇവിടെ എത്തിയത്.

നിരത്തിലൂടെ നടക്കുമ്പോൾ പഴയ മുഖങ്ങളെ കാണാൻ എന്റെ കണ്ണ്  ഉഴറി പാഞ്ഞു.  ഒന്ന് സൊറ പറയാൻ വിശേഷങ്ങൾ ആരായാൻ  മനസ്സിന് തിടുക്കമായി.  കളിച്ച് വളർന്ന വീടും പരിസരവും  കൂട്ടുകാരുമായി കളിച്ച് മറിഞ്ഞ മണൽ മൈതാനവും പിന്നെ പണ്ടത്തെ ആളെയും ആ വേലിക്കെട്ടും കാണുവാൻ കുറച്ച് സമയം മുമ്പ് ഞാൻ പോയിരുന്നു. എത്രയോ വർഷങ്ങൾക്ക് ശേഷമാണ് ഇവിടെ എത്തുന്നത്. വീട് നിന്നിടത്ത് ഇരു നില കെട്ടിടം, വേലി നിന്നിടം മതിൽ. പിന്നെ ആ ആൾ ഹോ! അവരെല്ലാം  ഏതോ സ്ഥലത്ത് എന്നെ ഓർക്കുകയോ ഓർക്കാതിരിക്കുകയോ ചെയ്ത് ഭാര്യയുടെ ഉമ്മയുടെ അല്ലെങ്കിൽ ഉമ്മുമ്മയുടെ  റോൾ നിർവഹിച്ച് ജീവിക്കുകയായിരിക്കാം. ഇപ്പോൾ എന്റേതല്ലാത്ത പണ്ട് എന്റെ സ്വന്തമായിരുന്ന വീടിനെ അപരിചിതനെ പോലെ ഞാൻ നോക്കി നിന്നു.

മഴക്കാലത്ത് ഉമ്മയുടെ വഴക്ക് അവഗണിച്ച് ചൂണ്ടയും എടുത്ത് പാഞ്ഞ് ചെന്നിരുന്ന കുളങ്ങൾ ഞാൻ തിരക്കി . ആ കുളങ്ങളെല്ലാം  നികത്തി അവിടെയെല്ലാം വലിയ കെട്ടിടങ്ങൾ....മണൽ നിറഞ്ഞ മൈതാനം നിറയെ വീടുകൾ. ബാല്യത്തിൽ കബഡി കളിച്ചിരുന്ന മാടനും പ്രാവും കളിച്ചിരുന്ന  സ്ഥലമാണെന്ന് തിരിച്ചറിയാത്ത വിധം ആസ്ഥലം മാറിയിരിക്കുന്നല്ലോ

മനസ്സിന് വിങ്ങൽ അനുഭവപ്പെട്ടു പ്രിയപ്പെട്ടതെല്ലാം നഷ്ടപ്പെട്ടത് പോലെ.

സക്കര്യാ ബസാറിലെത്തി പടക്ക കടകൾ തിരക്കി. പെരുന്നാളിന് ഇറച്ചി പോലെ ഒഴിച്ച് കൂടാത്തതാണല്ലോ പടക്കവും. അബ്ദുക്കായും കുപ്പായം ഇടാത്ത കോയാ ഇക്കായും ഉണ്ടോ? അവരെല്ലാം പടക്ക വിൽപ്പനയുടെ തിരക്കിലായിരിക്കാം.

എല്ലാവരും എന്നെ സൂക്ഷിച്ച് നോക്കുന്നു . ഇത് ആരാ ഒരു പുതിയ കക്ഷി. ഞാൻ ഒരു പഴയ ആലപ്പുഴക്കാരനാണേ എന്ന് വിളിച്ച് കൂവി.

“ആര് പറഞ്ഞ് അല്ലാ എന്ന്...“.ജീവിത പങ്കാളിയുടെ സ്വരം കേട്ട് ഞാൻ ഞെട്ടി ഉണർന്നു. പകലുറക്ക സ്വപ്നം  എന്നെ വല്ലാതെ തരളിതനാക്കി. കാര്യങ്ങൾ മനസ്സിലാക്കിയത് പോലെ അവൾ ചിരിച്ചു.

.ആലപ്പുഴയുമില്ല സക്കര്യാ ബസാറുമില്ല. പെരുന്നാൽ രാവ് തിരക്കുമില്ല. ഇവിടെ കൊട്ടാരക്കരയിൽ മിഥുന മാസത്തിലെ  മൂടിക്കെട്ടിയ അന്തരീക്ഷത്തിൽ ഈ പെരുന്നാൾ രാവിൽ വിരസതയുടെ വീർപ്പ് മുട്ടലുമായി ഞാൻ ഉറങ്ങി ഉണർന്നു.

അങ്ങ് ദൂരെ ദൂരെ സക്കര്യാ ബസാറിൽ പെരുന്നാൾ രാവ്  തിമിർത്ത് ആഘോഷിക്കുകയായിരിക്കും. എപ്പോഴും ഈ ദിവസത്തിൽ അവിടെ പോകാൻ ആഗ്രഹിക്കുന്ന എന്നാൽ ആ ആഗ്രഹം നിറവേറ്റാൻ കഴിയാത്ത  ഈയുള്ളവന്റെ എല്ലാ ആശംസകളും നിങ്ങൾക്ക് അർപ്പിക്കുന്നു ചങ്ങാതിമാരേ!

ഈദ് മുബാരക്ക്.

ഷരീഫ് കൊട്ടാരക്കര.

സിനാന് 13 വയസ്സ്

 ഇന്ന് ജൂൺ ഏഴ് തീയതി.

ഞങ്ങളുടെ സിനാൻ ഇന്ന് 13 വയസ്സിലെത്തി. എല്ലാ വർഷവും ജൂൺ ഏഴിന് അവന്റെ ജന്മ ദിനത്തിൽ  അവന്റെ ഏതെങ്കിലും ഫോട്ടോയുമായെത്തി  നിങ്ങളോട് അവന്റെ വിശേഷങ്ങൾ ഞാൻ പങ്ക് വെക്കാറുണ്ട്.. ഇന്നും അത് ചെയ്യുന്നു. അവ്ന്റെ ഫോട്ടോകളിൽ എനിക്കിഷ്ടപ്പെട്ട ഒരു ഫോട്ടോ ഇവിടെ ചേർക്കുകയും ചെയ്യുന്നു.

ഇപ്പോഴും സിനാൻ സ്വയമേ നടക്കാറില്ല. വർത്തമാനം പറയുകയുമില്ല. പക്ഷേ കഴിഞ്ഞ വർഷത്തേക്കാളും മോൻ  മെച്ചപ്പെട്ടിട്ടുണ്ട്. ഇപ്പോൾ കാര്യങ്ങൾ  സാവധാനത്തിൽ നിറുത്തി നിറുത്തി പറഞ്ഞാൽ  അവന് മനസ്സിലാകും, അതനുസരിച്ച് ചലനങ്ങളിൽ പ്രതികരിക്കുകയും ചെയ്യുന്നുണ്ട്. കഴിഞ്ഞ വർഷങ്ങളിൽ അവനെ കൊതുക് കടിച്ച് പിടിച്ച് ഇരുന്നാലും അവൻ അനങ്ങുകയില്ല. ജീവിതത്തിലെ പല വേദനകളോടൊപ്പമുള്ളതായിരിക്കും ഈ ഉപദ്രവവും എന്ന് അവൻ കരുതിക്കാണും. എന്നാൽ ഇപ്പോൾ കൊതുക് കടിച്ചാൽ അവൻ ചൊറിയുന്നുണ്ട്. അതായത് പ്രതികരണ ശേഷി ഉണ്ടാകുന്നുണ്ട്.എന്നതിന്റെ അടയാളമാകാമത്.

മറ്റ് ചില കാര്യങ്ങളിൽ   അവന് മുമ്പുള്ള  സ്വഭാവം ഇപ്പോഴും തുടരുന്നു. അതായത് ഇപ്പോഴും അവന് പാട്ട് കേൾക്കുന്നത് ഹരം തന്നെയാണ് ശാസ്ത്രീയ സംഗീതവും   പഴയ പാട്ടുകളുമാണ് താല്പര്യം. തലയാട്ടി രസിച്ച്കൊണ്ടിരിക്കും..  റാഫിയുടെ ദുനിയാ കെ രക് വാലേ പോലുള്ള പാട്ടുകളും, മലയാളത്തിലെ ചിരിക്കുമ്പോൾ കൂടെ ചിരിക്കാൻ പോലുള്ള പാട്ടുകളും  പുതിയ പാട്ടുകളിൽ ആട് ജീവിതത്തിലെ “പെരിയോനേ“  പാട്ടും  ക്ഷ  ഇഷ്ടായിട്ടുണ്ട് എന്ന് ഭാവങ്ങളിൽ നിന്നും വ്യക്തമാകുന്നു.

 ആഹാരത്തിൽ ഇഡിലും സാമ്പാറും അതിപ്രിയമാണല്ലോ.

ഇവിടെ നിന്നും 8 കിലോ മീറ്റർ ദൂരത്തിൽ കലയപുരം എന്ന സ്ഥലത്ത്  സിനാനെ പോലുള്ള കുട്ടികൾക്കായുള്ള സ്കൂളിൽ അവനെ കഴിഞ്ഞ വർഷം ചേർത്തു. രാവിലെ അവന്റെ മാതാപിതാക്കൾ സൈഫുവും ഷൈനിയും കോടതിയിൽ പോകുന്നതിനു മുമ്പ്   അവനെ വാഹനത്തിൽ സ്കൂളിൽ കൊണ്ട് വന്ന് വിടും. വൈകുന്നേരം സ്ഥാപനത്തിലെ ബസ്സിൽ അവിടത്തെ ജീവനക്കാർ മറ്റ് കുട്ടികളോടൊപ്പം അവനെ വീട്ടിൽ കൊണ്ട്  എത്തിക്കുകയും ചെയ്യും. സ്കൂളിൽ അവൻ കൂട്ടുകാരുമായി ഇടപെടുന്നുണ്ട്. അവരെ അവനും അവർക്ക് അവനെയും  വലിയ കാര്യമാണ്.  സിനാനോട് വീട്ടിൽ വെച്ച് കൂട്ടുകാരുടെ പേര് പറഞ്ഞ് സംസാരിച്ചാൽ അവൻ കണ്ണുകൾ വിടർത്തി മുഖത്ത് ഭാവങ്ങൾ പ്രകടിപ്പിക്കാറുണ്ട്. അവന്റെ കൂട്ടുകാരെ പറ്റി പറയാൻ അവന്റെ ഉള്ളകം ത്രസിക്കുന്നുണ്ടായിരിക്കാം. അവന് അതിന് കഴിയുന്നില്ലല്ലോ. എങ്കിലും ആ ഭാവമാറ്റം  ശുഭകരമായി എനിക്ക് അനുഭവപ്പെടുന്നു. വികാരങ്ങൾ പ്രതിഫലിപ്പിക്കാനുള്ള ശ്രമം എപ്പോഴും നാളെയെ പറ്റി നമുക്ക് പ്രതീക്ഷ നൽകുമല്ലോ

പ്രസവ സമയം 10 ദിവസം മുമ്പേ ആയിരുന്നു എന്ന കാരണത്താൽ ശ്വാസം മുട്ട് പ്രതിരോധിക്കാൻ  സ്വകാര്യ ആശുപത്രിക്കാർ ഇങ്ക്വിബേറ്ററിൽ മോനെ വെക്കുകയും തുടർന്നു ബന്ധപ്പെട്ട  ഡോക്ടറുടെ അനാസ്ഥയാൽ അവന് വിപത്ത് സംഭവിക്കുകയും ചെയ്തെന്നാണ് അറിയാൻ സാധിച്ചത്. പിന്നീട് സുപ്രസിദ്ധ ന്യൂറോ ച്കിൽസകൻ ഡോക്ടർ  മാർത്താണ്ഡൻ പിള്ളയുടെ ചികിൽസയിലാവുകയും ചെയ്തു. ഇപ്പോഴും മരുന്നുകൾ കഴിക്കുന്നുണ്ട്. ഇടക്കിടക്ക് ഫിസിയോ തെറാപ്പിയും, ഉണ്ട്.പിന്നെ മുകളിൽ ഇരിക്കുന്ന വലിയ ഡോക്ടറോട് ഹൃദയത്തിൽ തട്ടി പ്രാർഥിക്കാറുമുണ്ട്. അത് കൊണ്ട് തന്നെ  അവൻ നടക്കുമെന്നും സംസാരിക്കുമെന്നും സാധാരണ ജീവിതം കഴിച്ച് കൂട്ടുമെന്നും ഞങ്ങൾക്കെല്ലാം

ശുഭ പ്രതീക്ഷയുമുണ്ട്.

അതിനാലാണ്  ഞങ്ങളുടെ സിനാന് വേണ്ടി നിങ്ങളും പ്രാർത്ഥിക്കുവാൻ അപേക്ഷിക്കുന്നതു. പ്രാർത്ഥിക്കുമല്ലോ.

ഷരീഫ് കൊട്ടാരക്കര

അഞ്ച് മാർക്ക്

 ഇന്ന് മെയ് 27...

വർഷങ്ങൾക്കപ്പുറത്ത് ഒരു മെയ് 27 നാണ് പട്ടാ പകലിൽ എന്റെ ജീവിതത്തിൽ ഇരുട്ട് വന്ന് വീണത്. അന്നാണ് എസ്.എസ്.എൽ.സി. ഫലം പുറത്ത് വന്നത്. പത്രത്തിലെ കുനുകുനാ അക്കങ്ങളിൽ കൂടി അതി സൂക്ഷ്മതയോടെ  പരതി നടന്നിട്ടും എന്റെ നമ്പർ കാണാൻ കഴിഞ്ഞില്ല. കയർ ഫാക്ടറിയിൽ  ഉച്ചവരെ ജോലി  ചെയ്ത് കഴിഞ്ഞാണ് ഉച്ച കഴിഞ്ഞുള്ള  പരീക്ഷ എഴുതിയതെങ്കിലും ജയിക്കുമെന്ന ആത്മ വിശ്വാസം  വളരെ വലുതായിരുന്നു. ഞാൻ ജയിക്കുമെന്ന് ആലപ്പുഴ വട്ടപ്പള്ളിയിൽ ഉള്ള എല്ലാവരും വിശ്വസിച്ചു.  കാരണം കിട്ടുന്ന എല്ലാ പേപ്പറും നോട്ടീ3സും പത്രങ്ങളും വായിക്കുന്ന എനിക്ക് പരീക്ഷ  ഒരു പരീക്ഷണമേ അല്ലെന്ന് എല്ലാവർക്കും അറിയാമായിരുന്നു. അദ്ധ്യാപകർക്കും  ആ വിശ്വാസമുണ്ടായിരുന്നു. എല്ലാ കണക്ക് കൂട്ടലും തെറ്റി. ഞാൻ തോറ്റു. 

പക്ഷേ ഞാൻ കരഞ്ഞില്ല. കരഞ്ഞത് എസ്.എസ്.എൽ.സി. ബുക്ക് കയ്യിൽ കിട്ടിയപ്പോഴായിരുന്നു. ഏറെ കഷ്ടപ്പെട്ട് പഠിക്കുന്ന കുട്ടികൾക്ക് കിട്ടുന്ന ഫസ്റ്റ് ക്ളാസിന്റെ മാർക്ക് എനിക്കുണ്ട്. അന്ന് അത് അപൂർവമായിരുന്നല്ലോ. പക്ഷേ ഇംഗ്ളീഷിന് മാത്രം 100ൽ 35 മാർക്ക്.  അന്ന് ആ വിഷയത്തിന് 100ൽ 40 മാർക്ക് വേണമായിരുന്നു . 5 മാർക്കിന്റെ  കുറവിൽ  ഫസ്റ്റ് ക്ളാസിന്റെ മാർക്കുള്ള ഞാൻ തോറ്റു. വെറുതെ കരഞ്ഞു എന്ന് പറഞ്ഞാൽ ശരിയാവില്ല, വിങ്ങി വിങ്ങി കരഞ്ഞു.

സെപ്റ്റംബറിൽ വീണ്ടും എഴുതി ആദ്യ പരീക്ഷയേക്കാളും കുറവ് മാർക്കായാലും ഞാൻ  എസ്.എസ്.എൽ.സി. എന്ന കടമ്പ കടന്നു. പക്ഷേ എന്റെ ഒരു വർഷം നഷ്ടപ്പെട്ടു. ആ നഷ്ടം എന്റെ ജീവിതത്തിന്റെ  ഗതി മാറ്റി.  ഒരിക്കൽ പോലും പ്രതീക്ഷിക്കാത്ത കടവിലേക്കായിരുന്നു എന്റെ യാത്ര. അടുത്ത അദ്ധ്യയന  വർഷം വരെ  വെറുതെ ഇരിക്കേണ്ടാ എന്ന് കരുതി  ഹോമിയോപ്പതി പഠിക്കാൻ ഞാൻ പൊന്നാനിക്ക് സമീപം എടപ്പാളിലേക്ക് യാത്ര ചെയ്തു. ആ യാത്ര  ജീവിതത്തിന്റെ ഗതി മാറ്റി വിട്ടു .  ഏന്തെല്ലാമെന്തെല്ലാം  അനുഭവത്തിലൂടെ ഇന്ന് ഇവിടെയെത്തി.

സായിപ്പിന്റെ ഭാഷക്ക് 5 മാർക്ക് കുറഞ്ഞ് പോയതിന്റെ  കഥ ആയി മാറി എന്റെ ജീവിതം.

സഫായുടെ വര

ഞങ്ങളുടെ സഫായുടെ  പെൻസിൽ ഡ്രായിംഗ്.  സഫാ മോഡേൺ ആർട്ട് ഒട്ടും പഠിച്ചിട്ടില്ലെന്നും പറഞ്ഞ് വെക്കട്ടെ.
 

കാലാവസ്ഥ മാറ്റം

 ഒരു തോർത്ത് കൊണ്ട് വീശിയാൽ തീരുന്ന ചൂടും ഒരു തോർത്ത് പുതച്ചാൽ മാറുന്ന  തണുപ്പുമാണ് കേരളത്തിലെ  കാലാവസ്ഥ എന്ന് പ്രസിദ്ധ സാഹിത്യകാരൻ സി.രാധാക്രിഷ്ണൻ  പറഞ്ഞ് വെച്ചിട്ടുണ്ട്. ശരിയാണ്. അത്  ആയിരത്തി തൊള്ളായിരത്തി അന്ന്. ഇന്ന് ഒരു തോർത്തിന് പകരം  ഒരു എ.സി. കൊണ്ട് വീശിയാലേ ചൂട് തീരുകയുള്ളൂ എന്ന  മട്ടിലായി. അപൂർവമായി  കണ്ട് വന്നിരുന്ന ആഡംബര  വസ്തുവായ എയർ കണ്ടീഷണർ  ഇന്ന് സാധാരണക്കാരന്റെ  വീട്ടിലെ നിത്യ കാഴ്ചയായി മാറിയിരിക്കുന്നു.  അതിൻ പ്രകാരം കൊടുക്കേണ്ട കറന്റ് ചാർജ് ദുസ്സഹമായി തീർന്നു കഴിഞ്ഞു. ഇനി എത്ര രൂപാ ചെലവായാലും സാരമില്ല ഈ ചൂട് സഹിക്കാൻ വയ്യാ എന്ന അവസ്ഥയിൽ മനുഷ്യന് എന്ത് ചെയ്യാൻ കഴിയും. കൊച്ച് കുഞ്ഞുങ്ങൾ വെന്തുരുകുന്ന ചൂട് കാലാവസ്ഥ  വല്ലാതെ അസ്വസ്തപ്പെടുത്തുന്നു.

വലിയ രീതിയിൽ മാറ്റമില്ലാതെ കേരളത്തിലെ കാലാവസ്ഥ നില നിന്ന് വരികയായിരുന്നു. അത് കൊണ്ട് തന്നെ അന്യ സംസ്ഥാനക്കാർക്ക് കേരളം സ്വർഗമായി മാറി. മദിരാശിയിലെ തിളച്ച് മറിയുന്ന ചൂടിൽ നിന്നും  ചെങ്കോട്ട തുരങ്കം കടന്ന് തെന്മല എത്തുമ്പോഴുള്ള ആ കുളിർമയുണ്ടല്ലോ അതിന്ന് പഴംകഥയായി മാറിയിരിക്കുന്നു. എന്ത് പറ്റി നമ്മുടെ നാടിന് ?

പണ്ട് മലയാളികൾ കടൽ കടന്ന് ഗൾഫിലെത്തി അവിടെ നമ്മുടെ പ്രഭാവം കാണിച്ചു. ഇതാ ഇപ്പോൾ  മലയാളിയുടെ പുറകേ അവന്റെ  സ്വന്തം മഴയും കടൽ കടന്ന് ഗൾഫിൽ ചെന്ന്  തകർത്ത് പെയ്യുന്നു. മഴ അക്കരെ തകർത്ത് പെയ്യുമ്പോൾ  ഇക്കരെ മലയാളി  മഴ എവിടെ പൊയി മക്കളെ എന്ന് ആർത്ത് വിളിച്ച് കാലാവസ്ഥാ പ്രവചനവും പ്രതീക്ഷിച്ച് കഴിയുകയാണ്.

മറ്റെല്ലാ പ്രശ്നങ്ങളും മാറ്റി വെച്ച് കാലാവസ്ഥ വ്യതിയാനത്തെ പറ്റി പഠിക്കേണ്ട സമയം അതിക്രമിച്ചില്ലേ?