കടം...രോഗം ഇത് രണ്ടും ഇല്ലെങ്കിൽ ജീവിതം സമാധാനം നിറഞ്ഞതാകും.
പണ്ട് പട്ടിണിയുടെ പടു കുഴിയിൽ വീണ കാലത്തും എന്റെ പിതാവ് കടം വാങ്ങിയിരുന്നില്ല.
മരിക്കുന്നതിനു മുമ്പ് അദ്ദേഹത്തിന്റെ ആകെ ബാദ്ധ്യത: 65 പൈസാ മാത്രം, അതും അടുത്തുള്ള കടയിൽ. അത് കൊടുത്ത് തീർക്കാൻ എന്നെ ചുമതലപ്പെടുത്തിയിട്ടാണ് അദ്ദേഹം കണ്ണടച്ചത്.
അത് കണ്ട് പഠിച്ച ഞാൻ ജീവിതത്തിൽ കഴിവതും കടത്തിൽ ചെന്ന് പെടാതിരിക്കാൻ ശ്രമിച്ചിരുന്നു. നാല് ചുറ്റും കാണുന്ന പ്രലോഭനങ്ങളിൽ ചെന്ന് പെടാതിരുന്നാൽ ഒരു പരിധിവരെ ബാദ്ധ്യതപ്പെടാതെ ജീവിക്കാൻ കഴിയുമെന്ന് ജീവിതാനുഭവങ്ങൾ എന്നെ പഠിപ്പിക്കുന്നു.
എന്നാൽ ഇന്നത്തെ തലമുറ എല്ലാതരത്തിലും കടത്തിൽ ചെന്ന് വീഴാനുള്ള സാഹചര്യങ്ങൾ ലോകത്ത് ധാരാളമാണ്.
പ്രലോഭനങ്ങളുടെ പെരുമഴയിൽ അവർ പെട്ട് പോകുന്നു. കമ്പോളം അവരെ ഓരോ പലോഭനങ്ങളിൽ എളുപ്പത്തിൽ വീഴിക്കുന്നു.
വീട്, വാഹനം, മൊബൈൽ, റ്റി.വി., അങ്ങിനെ നാനാവിധ പ്രലോഭനങ്ങൾ. അവയെല്ലാം വാങ്ങാനുള്ള തുക ഉദാരമായ വ്യവസ്ഥകൾ എന്ന് തെറ്റിദ്ധരിപ്പിച്ച് നമ്മളെ കൊണ്ട് കടത്തിൽ ചാടിക്കുന്നു. ഇൻസ്റ്റൽമെന്റ്, ഇ.എം.എ. തുടങ്ങിയ മനോഹരമായ പേരുകളാൽ ഈ കെണിയുടെ ഉപരിതലം മറച്ച് നമ്മളെ അതിൽ പെടുത്തുന്നു. ലോൺ തരുമ്പോഴുള്ള ഉദാരത തിരിച്ചടവ് മുടങ്ങുമ്പോൾ കാണിക്കാറില്ല. അവിടെ ഇറച്ചി വെട്ടുകാരന്റെ വെട്ട് കത്തിയേക്കാളും ക്രൂരമാണ്. പെരുമാറ്റം.
ഉറക്കമില്ല, സ്വസ്തതയില്ല, ശാന്ത സ്വഭാവക്കാരനായ നമ്മളെ അസഹിഷ്ണതയും കളവ് പറയുന്നവനുമാക്കി മാറ്റുന്നു.
ലോണെടുത്ത് വീട് വെച്ചവന് സമാധാനമായ ഉറക്കം ആ വീട്ടിൽ കിട്ടുകയില്ല.
തിരിച്ചടവ് ഇ.എം.എ. ഏത് നേരവും ഈ ചിന്ത തന്നെയാണ് മനസ്സിൽ.
അപ്പോൾ ചിന്തിക്കും ഉള്ളത് കൊണ്ട് തൃപ്തിപ്പെട്ട് ജീവിച്ചാൽ മതിയായിരുന്നു, എന്ന്.
വർഷങ്ങളുടെ കോടതി അനുഭവങ്ങളിൽ നിന്നുമാണ് ഈ കുറിപ്പുകൾ.
